阿奈：「做咩叫佢地一齊食姐？！」阿奈細細聲係阿ｓａｍ耳邊講。
阿ｓａｍ：「咁唔係點呀？叫佢地走呀？」
阿奈：「如果一陣阿ｋａ記得佢咁點呀？！」
阿ｓａｍ：「唔會既，你睇下，阿ｋａ都無咩反應。」
阿奈：「我唔知！仲之我唔會比佢兩個係返埋一齊架啦！」
阿ｓａｍ：「而家阿柔都同阿鋒散左啦．．．．」
阿奈：「散佢個頭呀！佢都之不過係話分開冷靜下之嘛！」
阿ｓａｍ：「咁咪差唔多．．．．」
阿奈：「咩差唔多呀？！差得遠呀！」
我：「喂，你兩個係度咬耳仔講咩姐？」
阿奈：「你八卦啦你。」
我：「咩姐．．．唔講得比我聽咪算囉．．．哼．．．」
我：「咦，你又同我地同一間學校架？」我望到阿鋒同我地著埋同一間學校既校服。
阿鋒：「下．．．．係呀．．．」佢好似有ｄ愕然，好似估唔到我會同佢講野咁。
我：「你讀咩班架？」
阿鋒：「下．．．咪同你地一班囉．．．」
我：「下，同一班？我好似未見過你咁既．．．．」
阿鋒：「係咩．．．你唔留意掛．．．」
我：「咁你地呢，你地都係同我同一班架？！」我指住阿ｓａｍ同阿龍問。
阿ｓａｍ：「係呀。」
我：「唔係掛？！我好似從來都未見過你地咁喎！」
阿奈：「哎呀，佢地今年新轉黎架！」
我：「新轉黎？！咁佢又話係我一直無留意既？」我心諗，無理由架。有三個咁靚仔又咁型仔既同學，無理由唔發現架。
就算我唔發現呀，阿奈或者同班個班豬扒都發現啦。無理由我會唔知既。
阿奈：「佢頭先亂講之嘛。係呀，新轉黎架。」
我：「哦，你話係就係啦。」
阿ｓａｍ：「喂，食飽未呀？食飽就行啦。」
阿龍：「嗯，行啦。」

∼∼學校，課室∼∼
我地五個返到課室，ｄ同學就已經起哄。
同學ａ：「ｓａｍ哥鋒哥龍哥，咁早呀你地，食左早餐未呀？」呢個同學係上年同我地同班既其中一個同學。
做咩佢會識得阿ｓａｍ佢地既．．．．乜佢地唔係新轉校黎架咩？
阿ｓａｍ：「關你蛋治咩，彈開啦。」
同學ａ：「係既係既。」
我：「喂，你又話佢地新轉黎既？點解阿邊個邊個好似識佢地咁既？」我問阿奈。
阿奈：「人地一早係出面識得架啦，你未見過姐。」
我：「哦。」
阿奈：「死啦，再咁落去遲早穿架咋。你咪當阿ｋａ蠢先得架．．．．雖然佢又真係不嬲都蠢蠢地。」阿奈又係阿ｓａｍ耳邊細細聲講。
阿ｓａｍ：「見步行步啦。而家都返到黎學校囉。」
阿奈：「唯有係咁。」

就係我地大家無無聊聊等緊ｍｉｓｓ入黎既時候，有兩個人走左入黎。
一個係女仔，一個係男仔。
個個女仔．．．．咦，咁熟面口既？
佢咪好似係上次係茶餐廳個度，坐係阿鋒隔離個個女仔？
阿龍：「喂，柔姐呀！」阿龍見到係阿柔，即刻拍一拍阿鋒。
阿ｓａｍ阿奈阿鋒聽到佢咁講都呆左呆。
阿鋒：「做咩你會係度架？」佢行去阿柔面前問。
阿柔：「咁你係呢間學校返學嘛，我咪轉校黎陪你囉。」
阿鋒：「駛咩搞咁多野姐，平時仲見唔夠咩？」
阿柔：「咁我都係想陪下你姐．．．．」
阿鋒：「是但啦。你自己搵個位坐啦。」阿鋒講完之後又返返埋位。
阿柔揀都唔駛揀，佢跟住阿鋒行埋位，就坐在係阿鋒隔離。

阿ｓａｍ：「今次有戲好睇啦。」
阿奈：「個死八婆黎呢度做咩呀？！」
阿ｓａｍ：「我點知佢。」
阿奈：「佢唔係話要同阿鋒分開冷靜下架咩？！而家又死黎呢度做咩？！」
阿ｓａｍ：「或者佢覺得冷靜夠啦，係時候同返阿鋒一齊啦掛。」
阿奈：「佢唔好係度搞搞震，如果唔係我實行將佢煎皮拆骨！」

另外咪仲有個男仔既，而家望下佢，發覺原來佢都幾型幾靚仔架喎。
哈，我地學校幾時變左靚仔型仔集中地架？
今年多咁多仔入黎讀既？！
我：「喂，岩你呀。」我搵手肘撞一撞阿奈，笑住咁同佢講。
阿奈：「幾靚仔呀，又型喎。」
我：「係喎，又高呢。」
阿奈：「係囉，正呀。」阿奈個樣擺到明流晒口水。
阿ｓａｍ：「咁正咪去溝人囉．．．．」
阿奈：「咩姐，你好想我去溝佢咩？」
阿ｓａｍ：「咁又係你自己話正既。」
阿奈：「正都唔一定要溝架嘛。」
阿ｓａｍ：「係咩？！我睇你個樣好似好想溝人咁喎。」
阿奈：「邊有？！」
阿ｓａｍ：「哼。」
阿奈：「做咩姐．．．嬲呀？」
阿ｓａｍ：「係架啦，鬼叫你讚人型仔靚仔呀？！家陣我唔型咩？！」
阿奈：「咁人地靚仔喎！」
阿ｓａｍ：「咁我而家唔靚仔咩？！」
聽到佢呢句我真係想笑出黎。
阿奈：「人地靚仔ｄ囉！」
阿ｓａｍ：「咁佢又唔夠阿鋒靚仔呀！」
阿奈：「但係佢靚仔得黎又有ｄ型喎！」
阿ｓａｍ：「挑！咁咪姐係阿龍既翻版！」
阿奈：「嘩！擺到明佢好過阿龍好多啦！你睇下，人地幾高先得架。」
阿ｓａｍ：「咁佢咁好你咪去溝佢囉！」
阿奈：「挑！溝咪溝！你叫架咋！陣間唔好係度呷醋呀？！」
阿ｓａｍ：「我實會架喎！」
阿奈：「咁你就唔好叫我溝啦！」阿奈聽到佢呢句都唔知好嬲定好笑。
阿ｓａｍ：「你咁想，我無理由阻止你架！去囉！」阿ｓａｍ個樣有ｄ發脾氣。
阿奈：「做咩姐．．．真係呷醋呀？」阿奈見到佢咁既樣，都細聲返ｄ同佢講野。
阿ｓａｍ：「係呀！唔得呀？！」
阿奈：「咩喎，咁我讚下佢之嘛．．．又無話一定要溝．．．」
阿ｓａｍ：「你係我面前讚第二個男人喎！」
阿奈：「咁，咁讚下唔得咩？我成日都係咁架啦．．．．」
阿ｓａｍ：「哦，咁好囉！下次到我讚下ｄ女又索又靚囉！」
阿奈：「你．．．！唔得呀！我唔准！」
阿ｓａｍ：「唔准我讚其他女，你自己讚其他仔就得！」
阿奈：「大家一齊唔好讚囉！」

阿ｓａｍ：「唔好讚咪唔好讚囉！反正我都唔昄女架啦！」
阿奈：「呀．．．唔好嬲啦．．．」佢拉住阿ｓａｍ隻手係度ｆｉｎｇ。
阿ｓａｍ：「嬲呀，鬼叫你讚人。」
阿奈：「黎啦．．．唔好嬲啦．．．」
阿ｓａｍ一路望住阿奈，一路忍笑。
阿ｓａｍ：「係啦係啦，唔嬲啦，咁你唔准再讚人架喎。」
阿奈：「嗯。」
阿ｓａｍ：「咁算啦，錫返啖算啦。」
阿奈：「下？！」
阿ｓａｍ：「下咩呀？咁你激嬲左我係咪要錫返先？！」
阿奈：「唔好啦．．．．．．」
阿ｓａｍ：「無得唔好呀，快ｄ錫。」
阿奈好無奈．．．．唯有錫返啖阿ｓａｍ。
阿ｓａｍ：「算你啦。」

我一路睇住阿ｓａｍ同阿奈係度耍花窗，一路係度笑。
突然有個人坐左係我隔離。
望一望，咦，原來係個個靚仔。
男仔：「ｈｉ！」佢主動同我打招呼。
我：「下．．．哦．．．ｈｉ．．．」我都唔知比咩反應佢好，因為我根本無諗過佢會同我講野。
男仔：「我叫阿逸呀，你叫咩名呀？」
我：「下．．．？我．．．叫阿ｋａ呀。」
阿逸：「哦．．．」
大家靜左，因為我都唔知再繼續同佢講ｄ咩好。
呢個阿逸都唔算ｃｏｏｌ喎，竟然會同我主動打招呼。
不過唔知會唔會又係ｄ串柒柒既人呢．．．．．．．．．．
我：「係呢．．．你．．．做咩會轉黎呢間學校讀既？」
阿逸：「搬屋咪轉校囉。」
我：「哦．．．」
阿逸：「不如今日一齊去食ｌｕｎｃｈ囉。」
我：「下？！哦．．．好呀．．．」我嚇左一跳，咁快約我去食ｌｕｎｃｈ？！

我：「喂，一陣同埋個條仔一齊去食ｌｕｎｃｈ囉。」我拍一拍阿奈，同佢講。
阿奈：「下？！咁快約埋一齊食ｌｕｎｃｈ啦？」
我：「佢約我架咋！」
阿奈：「唔啦，費事阿ｓａｍ呷醋。」
我：「唔好啦，一齊去啦。得我同佢去好似唔知點咁．．．．」
阿奈：「咪岩囉，比你兩個二人世界啦。條仔唔差架，去啦。」
我：「你都痴線既，無啦啦講埋ｄ咁既野。」
阿奈：「咩姐，咁你咁耐都無男朋友，係咪好應該識返個先？！」
我：「你估我係你咩？我先唔恨呀。」
阿奈：「係呀係呀，唔恨。」
我：「咁真係唔恨丫嘛．．．．點呀？一齊去食飯啦。」
阿奈：「唉，係啦，我問下阿ｓａｍ先啦。」

阿奈：「老公．．．．」
阿ｓａｍ：「嗯？」
阿奈：「阿ｋａ話．．．．」
阿ｓａｍ：「話咩？」
阿奈：「佢話同埋個條新黎既仔一齊去食飯喎．．．．．」
阿ｓａｍ：「淨係得你兩個同佢？」
阿奈：「我唔知呀．．．．」
阿ｓａｍ：「食飯？得呀，大家一齊去囉。」
阿奈：「下，姐係你地都去呀？」
阿ｓａｍ：「係呀，唔得呀？」
阿奈：「唔係．．．．．．．．」

阿奈：「佢話可以去喎．．．．」
我：「正！咁我就唔駛怕啦。」
阿奈：「不過．．．．．佢地都一齊去喎．．．．」
我：「下．．．．不過是但啦，又無咩所謂既。」
阿奈：「嗯．．．．．」

∼∼ｌｕｎｃｈ時間∼∼
阿逸：「喂，行囉。」
我：「下，等陣。」
阿逸：「做咩？」
我：「等埋阿奈佢地先啦。」
阿逸：「佢地又去呀？」
我：「係呀。你唔鍾意呀？」
阿逸：「唔係呀，無所謂。」

阿龍：「行得未呀？好撚肚餓呀。」
阿奈：「餓得死你咩？！而家咪行囉。」
阿ｓａｍ：「喂，你同唔同我地去食飯呀？」佢問阿鋒。
阿鋒：「是但。」
阿柔：「我又要去。」阿柔見到阿鋒話去又話要跟埋黎。
阿奈：「人去你又要去，跟尾狗。」
阿ｓａｍ：「算啦，唔好嘈啦，行啦。」

我：「做咩你好似無咩心機咁既？」我同阿奈撓住手一齊行。
阿奈：「仲好講，人地諗住淨係得我同你同埋個條仔去食飯架嘛，點知佢地又一齊黎喎。」
我：「哦，咁又係既。咁靚仔，岩你丫嘛。」
阿奈：「咩姐，我好專一架，諗住識多個朋友仔之嘛。」
我：「係呀係呀，專一。」我係度笑。
阿奈：「我真係好專一架！我淨係鍾意山下智久架咋！」
我：「你死啦你！一陣比阿ｓａｍ聽到你仲唔死？！」我大笑。
阿奈：「車！聽到咪聽到囉！我先唔怕佢呀！」知唔知咩叫死雞撐飯蓋？阿奈而家就係啦！哈哈！
阿ｓａｍ：「你話鍾意邊個話？」阿ｓａｍ突然之間係阿奈後面問。
阿奈：「下？！」佢直頭嚇到跳左一跳。
阿ｓａｍ：「我問你對住邊個專一呀？」
阿奈：「咪．．．．你囉！你知我好鍾意你架！」死兜緊，哈哈！
阿ｓａｍ：「係咩？我明明好似唔係聽到你對住我專一架喎！」
阿奈：「邊有姐？你聽錯啦，阿ｋａ呵？」佢係咁同我打眼色。
我：「我咩都聽唔到呀！咩都聽唔到，咩都睇唔到！」呢ｄ咁既情況梗係閃水啦，仲留係度咩。
阿奈：「你．．．！死八婆！」佢啤住我，簡直係度咀咒緊我。
估到佢而家呢刻簡直想殺左我啦！哈哈！

阿ｓａｍ：「點呀？對邊個專一呀？鍾意邊個呀？」
阿奈：「都話你囉！」佢即刻撓住阿ｓａｍ。
阿ｓａｍ：「係呀？！你下次再亂講丫，睇下我放唔放過你。」佢攬住阿奈。
阿奈：「你可以點樣唔放過我呀？」
阿ｓａｍ：「你話呢？我唔知我返到屋企會做ｄ咩架。」佢望住阿奈係度淫笑。
阿奈：「係啦，唔講啦！」阿奈見到佢咁既樣都心中有數佢會做ｄ咩，即刻識趣收聲。
睇黎阿奈都係比阿ｓａｍ食住架啦。
不過都唔係既，阿ｓａｍ有時都會怕左阿奈，咁樣係咪應該叫做大家都食住大家呢？

∼∼茶餐廳∼∼
阿龍：「睇下有咩食先。」阿龍第一個睇張餐牌。
阿奈：「係都係我睇先啦！」阿奈就一手搶左去。
阿龍：「拎返黎！」阿龍又搶返。
阿奈：「你家陣係咪唔比我呀？！」佢直頭叉住條腰係度講。
阿龍：「係架啦，係唔比架啦，咁點呀？！」
阿奈：「你比唔比呀？！」
阿龍：「唔比！」
阿奈：「嗚．．．．老公呀．．．」
阿龍：「係啦係啦，比你啦，唉．．．．」阿龍睇黎都好就阿奈。
阿奈：「咁咪乖囉，一早比我咪好囉，係要人出聲先得既。」
阿龍：「比你你就睇啦，仲要咁多野講。」
阿奈：「咁家陣係咪唔講得丫？！」
阿龍：「唔係，點敢唔比你講．．．．．」
阿奈：「咁咪得囉！」
睇黎阿奈都唔係同阿龍佢地識左好耐姐，點解佢地好似咁熟咁既？

係我地玩緊笑緊既同時，阿鋒同阿柔都無咩點出過聲。
反而阿逸就同我地玩得好開心，大家都有講有笑。
其實阿逸都算幾串，睇佢同阿奈講野個陣就知啦。
我：「喂，佢兩個一齊左好啦架啦？」我望住阿鋒同阿柔問阿奈。
阿奈：「鬼知佢地呀？」
我：「做咩姐？你好似唔鍾意佢兩個咁既？」
阿奈：「無啦啦做咩要鍾意佢地呀？我同佢地唔係好熟架咋！」
我：「唔係喎，我睇落你地好似識左好耐咁既？」
阿奈：「邊係姐。」 　

我：「硬係覺得你地有ｄ野係呃住我既，但係我又講唔出係咩喎。」
阿奈：「痴線，無啦啦做咩要呃你。食飯啦，咪理咁多。」
講真，我真係覺得好似同佢地識左好耐咁。
我又諗唔明，點解阿奈好似唔係好鍾意阿鋒同阿柔。
佢話同阿龍佢地唔係識左好耐，我係我又覺得佢地好似好ｆｄ好玩得咁。
尤其見到阿龍同阿奈係度玩到攬埋一舊，但係阿ｓａｍ又無咩反應，我就梗加覺得。

一路食飯一路有ｄ女走埋黎，唉，鬼咩，我地張台坐著四個靚仔型仔丫．．．．
ｄ女一入黎餐廳就好似發左癲咁．．．．我好無奈囉．．．．
阿龍：「哎呀，你地走啦．．．好煩呀。」阿龍比幾條女拉住。
女：「阿龍呀，你呢排去左邊姐？我地搵你都搵唔到既？」
阿龍：「咪煩啦，我要搵你自然會搵啦，駛鬼你地搵我咩。」
女：「你唔理我地啦？」
阿龍：「哎呀！死開啦！比我食埋餐飯先得唔得呀？！」
ｄ女見到阿龍咁講，唯有走啦，唔通仲留係度比人鬧咩。
阿ｓａｍ唔駛講啦，有阿奈係度，無咩女敢行埋黎架啦。
試下有女埋阿ｓａｍ身丫，阿奈初時都會啤住佢地既，如果ｄ女做多少少野，阿奈一定會煎巴佢地。
阿鋒？佢望都唔望ｄ女，淨係靜靜地坐係度食野。
又係既，阿柔係度，佢都應該唔敢同女仔講野架啦。當然，呢個係我既諗法。
阿逸都有ｄ支持者，係咁係佢身邊講野。
女ａ：「喂，呢個男仔都幾靚仔幾型喎。佢新黎架？定係識得阿ｓａｍ佢地架？」
女ｂ：「我點知姐，唔好理咁多啦，佢仲好似好過阿龍，不如過去問佢拎電話啦。」
阿奈聽到條女講呢句即刻係度笑。
阿奈：「龍仔，聽唔聽到呀？唔係得我一個話阿逸好過你架！」
阿龍：「乜撚野呀？家陣我好差咩？！」
阿奈：「唔係你差，係你矮！你好似唔似似阿鋒咁矮囉！」
阿鋒：「喂喂喂，無啦啦又燒埋黎我度？！」
我：「咪係囉！阿鋒都唔係好矮之嘛！」唔知點解聽到阿奈話阿鋒，我個心又好似有ｄ唔抵得。
阿奈：「做咩幫住佢呀？！佢唔係好矮！不過都係矮過阿ｓａｍ呀！」
我：「挑！咁無得講啦！生咁高做咩姐，抹窗咩！」
阿奈：「高都好過矮呀！」
我：「阿鋒好高架啦！起碼高過我同你呀！」咁事實上我真係唔覺得佢矮喎．．．．．
阿奈：「高過我同你有春用咩！呢度咁多個男仔佢最矮丫嘛！」
我：「你．．．！無野啦！」我發脾氣。
阿奈：「你幫住佢做咩姐？人地條女都未出聲。」
我：「又係喎．．．算啦。」咁又係，人地條女係度都未出聲，我做咩要出聲呀？
女ａ：「你．．．叫咩名呀？」條女行埋黎問阿逸。

而阿逸就啤一啤佢就算。
女ａ＋ｂ＋ｃ同時係度叫：「哎呀，佢好ｃｏｏｌ好型呀！」
ｃｏｏｌ？唔係掛．．．我唔覺得佢ｃｏｏｌ喎．．．．
佢上堂個陣仲主動同我打招呼既。
女ｂ：「你叫咩名姐？比個電話我地呀。」
嘩．．．我終於見識到咩叫發姣發到出面啦。
條女而家個樣擺明就寫住想溝阿逸啦！
不過阿逸都係無理到佢地。
我：「喂，你理下人啦。」我笑住同阿逸講。
阿逸：「做咩要理佢地姐？」
我：「人地溝係喎！咁都唔理下人？」
阿逸：「個個溝我既我都要理我咪好唔得閒？」

阿奈：「哎呀！咪煩啦，人地唔會ｓｈｏｗ你地架啦，死心吧啦。」
女ａ：「又關你事？！」
阿奈：「而家你地係度嘈生晒影響到我喎！咁你話關唔關我事啦？！」
女ｂ：「收聲啦！你痴埋阿ｓａｍ度我都未同你計呀！」
阿奈：「我痴埋佢度？！你無野呀？！」
女ａ：「唔係你痴埋佢度咩？！以前我已經睇你唔順眼架啦！成日同阿ｓａｍ係度嘈！你有咩資格同阿ｓａｍ嘈呀？！」
阿奈：「嘩！你都痴撚線既！我同佢不嬲都係咁架啦！你第一日知呀？！」
女ｂ：「仲有你呀！成日痴住阿鋒！而家阿鋒有女朋友你又痴埋呢條仔度！」條女指住我黎講。
我：「下？！你唔係話我呀？！」我聽到佢話我我差點噴返我口入面個啖檸檬茶出黎。
女ｂ：「係呀！係話你呀！姣婆！」
我：「下？！我無聽錯呀？！我同阿鋒都識左唔夠一日，你話我成日痴住佢？！」我直頭覺得佢講野莫名其妙。
女ｂ：「咩呀？你咪扮野呀！識左唔夠一日！我以前成日見到你同佢玩到係咁笑架！」
阿ｓａｍ：「收聲啦！講撚完未呀？！一個二個同我走呀！」阿ｓａｍ突然大聲咁講。
班女即刻收晒聲，梗係啦，怕左阿ｓａｍ喎。
阿鋒：「走唔撚走呀？！仲企係度做乜柒呀？！」估唔到阿鋒都會出聲。
班女諗住走啦，不過我唔想咁易比佢地走。
我：「喂！你企係度呀！我問你呀，我幾時有成日痴住阿鋒呀？！」我拍台企係身望住條女講。
阿奈：「哎呀，你比佢地走啦！無呀，你無痴住佢呀！」阿奈拉住我。
我：「佢而家屈我喎！」
阿奈：「係啦係啦，下次我同你打巴佢，比佢地走啦。」
我坐返低。好，我算！今次我就忍你！
班女終於都走左，靜晒。
我：「都痴撚線架！我識佢一日都唔夠話我成日痴住佢！」
阿奈：「係啦，唔好咁嬲啦！」
我：「咁係丫嘛！人地有女架嘛！係都唔係我痴住佢啦！」
阿逸：「唔好咁嬲啦，食野啦好無？」阿逸推左杯凍檸茶去我面前。
阿奈：「嚇死我，差ｄ穿煲。好彩你醒目出聲姐。」阿奈捉住阿ｓａｍ係度講。
阿ｓａｍ：「梗係啦，唔係容乜早穿呀。」
阿奈：「係啦，最醒係你啦。」
阿ｓａｍ：「唉，咁樣遲早落去佢都係會記返起架咋喎。」
阿奈：「咁唔係點姐．．．．．日日都見到．．．．」
阿ｓａｍ：「我都唔知點．．．．」

∼∼夜晚∼∼
夜晚無無聊聊一個人係屋企，都唔知有咩好做。
「何以我變了你的十六號愛人…」（編者話：阿ｋａ既電話鈴聲轉左做十六號愛人）
係阿奈．．．
我：「喂？」
阿奈：「喂，做緊咩呀？」
我：「無野做，係度對住部電腦發呆．．．．」
阿奈：「落唔落Ｄ呀？」
我：「落Ｄ？」
阿奈：「做咩呀，好出奇咩？以前你都成日同我去架啦。」
我：「我知，我唔係出奇呀。是但啦，反正係屋企都係悶。」
阿奈：「咁你快ｄ換衫係樓下等啦。」
我：「嗯。」
收左線之後我就啦啦臨換衫。
其實我唔係覺得出奇，之不過阿奈又會咁好死叫我落ｄ既．．．．．
乜佢條仔比佢去咩？

落到樓下。
個死八婆仲未到。唉，一早知佢係例遲，早知我都遲ｄ先出門口啦，搞到而家戇居居企係度食風。
無無聊聊，四圍望下。
咦，個個咪阿鋒？佢又會一個人企係度既？
我：「咦，咁岩既？」我行埋去問佢。
阿鋒：「下，係囉，咁岩既。」佢比我嚇左一嚇。
我：「等人呀？」我見佢左望右望就問。
阿鋒：「下，係呀．．．」
我：「哦．．．」
大家都唔知再講ｄ咩好，唯有企係度等啦。
過左幾分鐘。
阿奈同阿ｓａｍ終於出現啦。
阿奈：「做咩條卜X會係度架？」阿奈一見到阿鋒就問阿ｓａｍ。
阿ｓａｍ：「下，咁平時都係叫埋佢落去架啦．．．．」
阿奈：「你明知阿ｋａ係度就唔好叫佢嘛！」
阿ｓａｍ：「就算我唔叫，佢都會落去架啦。遲早都要見．．．」
阿奈：「唉．．．算啦。」
我：「喂，咁鬼耐架你。」
阿奈：「出門口整野遲左嘛，我地行囉。」佢拉住我行，應該係唔想我同阿鋒行埋一齊掛。
我：「喂，乜佢兩個又去咩？」我見阿ｓａｍ同阿鋒都係度就問。
阿奈：「都話左佢兩個係兄弟啦，咁一齊去有咩咁出奇？」
我：「咁又係。但係做咩唔見個個阿龍同埋佢條女既？」
阿奈：「你咪鬼咁八啦，我點知咁多。」
我：「哦．．．」
好無奈．．．．阿奈好似唔係咁鍾意提起阿鋒ｄ野．．．． 　

落到ｄ場，撞到好多ｆｄ係度。
ｆｄ：「喂，咁耐無見你，你去左邊呀？」其中一個ｆｄ走埋黎問我。
我：「我之前入左醫院嘛。」
ｆｄ：「無啦啦做咩入醫院呀？你唔係ｔａｋｅ野ｔａｋｅ到入廠呀？」
我：「我ｔａｋｅ野？！唔係掛？！你知我不嬲都唔掂呢ｄ野架。」
ｆｄ：「係呀，你以前係唔掂呀，但係你一個月前．．．」佢都未講完，就已經比阿奈一手遮住個口，仲要拉走埋ｔｉｍ。
阿奈：「喂，你咪亂講啦，佢失左憶，咩都唔記得呀。」阿奈細細聲同條友講。
ｆｄ：「失憶？唔係掛，佢仲記得我地喎。」
阿奈：「哎呀，仲之就係煩啦，佢唔記得架啦，你唔好亂講就得啦。」
ｆｄ：「哦。」
我：「喂，做咩無啦啦又係度咬耳仔呀？」我好奇，點解次次都係咁。
阿奈：「下，無野，我岩岩同佢講起ｄ野，唔比得你地知嘛。」
我：「哦。係呢，你又話我一個月前咩呀？」我問返個個人。
ｆｄ：「下，無野。我話你一個月前都係無ｔａｋｅ野之嘛。」
我：「一個二個係度整蠱做怪，有咩好快ｄ講我知啦喎。」
ｆｄ：「無呀無呀，真係無野呀。」佢係咁同阿奈打眼色。
阿奈：「係囉，邊有野呀。我地去跳舞啦。」佢拉左我出舞池。
算啦，佢地唔講我都無計。
雖然我一直都好懷疑，阿奈佢地好似有野瞞住我咁。
其實都幾無癮，次次問阿奈佢地都係咁既反應，我直覺話我知，佢地一定係有野唔比得我知既。
不過都無辦法架啦，佢地唔講就點都唔會講，尤其識左阿奈咁耐都知佢係咩人，佢唔想講既話你點問都係晒氣，倒不如留返啖氣黎暖下個胃。

落到舞池跳舞。
咁我又唔ｔａｋｅ野，除左跳之外就係四圍望架姐。
望下望下，又見到有個男仔好熟口面喎。
佢咪阿逸？！
估唔到佢都會黎呢度玩，哈，睇佢個樣仲好似爆緊ｔｉｍ。
我：「喂，我好似見到阿逸呀。」我拍一拍阿奈。
阿奈：「係？係邊呀？」
我：「呢，個個呀。係咪真係佢呀？」我指住阿逸問。
阿奈：「我點知姐，無帶眼鏡咁遠睇唔清楚呀。過去睇下咪知囉。」阿奈拉左我行過去。
阿奈：「喂！」佢拍一拍個條仔。
阿逸：「咦，咁岩呀。」原來真係阿逸，睇黎佢仲爆得好西利ｔｉｍ。
我：「係呀，我同阿奈落黎玩之嘛。」
阿逸：「得你兩個咋？」
我：「唔係呀，阿ｓａｍ佢地都係度。」
阿逸：「哦．．．．．」
就咁，我地一齊玩一齊跳啦，雖然阿逸都係爆到唔知似咩架啦．．．．
阿奈：「喂，你同我睇住佢一陣，記住，千其唔好比佢同阿鋒講野，我過去搵阿ｓａｍ。」阿奈同阿逸講低左呢句之後就走左去。
我：「喂！你去邊呀？」我想追出去。
阿逸：「佢去搵阿ｓａｍ呀，叫我睇住你。」阿逸拉住我。
呃．．．．我望一望阿逸．．．．真係唔知而家係我睇住佢定佢睇住我．．．．
鬼咩，都已經爆到豬西咁啦．．．．．仲邊度可以睇住我．．．．
我：「喂，你得唔得呀？」我見佢真係已經爆得好緊要，就問。
阿逸：「得，我無事喎。」
我：「哦。」
咁我見佢話得，就無乜點理到啦，繼續各自各跳舞。

∼∼舞池出面∼∼
阿奈：「老公！」阿奈一野就係反面攬住阿ｓａｍ。
阿ｓａｍ：「做咩呀，傻妹？」佢笑笑口攬返住阿奈。
阿奈：「無呀，見你一個人坐係度咁悶咪過黎陪你囉。」
阿ｓａｍ：「你唔駛睇住阿ｋａ咩？」
阿奈：「頭先見到阿逸呀，有佢係度唔駛我睇住啦。」
阿ｓａｍ：「乜阿逸都係度咩？」
阿奈：「嗯！」
阿ｓａｍ：「咁有阿逸係度睇住都好ｄ既。」
阿奈：「梗係啦，如果唔係佢係度，我咪成晚都要係阿ｋａ身邊？」
阿ｓａｍ：「做乜鬼你咁緊張姐？」
阿奈：「咁我唔想比佢同條卜X講野嘛，點知條卜X一陣會唔會再講ｄ咩傷害到佢架？！」
阿ｓａｍ：「傻啦，阿鋒個日都係一時衝動先會咁講架姐．．．佢見到阿ｋａ跳樓都知自己衰啦．．．」
阿奈：「咁就死啦！要阿ｋａ跳樓先知自己有錯，咁阿ｋａ咪十條命都唔夠死？！」
阿ｓａｍ：「咁．．．阿鋒都係一時之間唔知點做先會咁姐．．．」
阿奈：「我唔理！總之我就唔會比佢兩個係返埋一齊！」
阿ｓａｍ：「唉，服左你．．．．」
阿奈：「咩姐．．．．」
阿ｓａｍ：「無野無野．．．．飲野啦．．．」
阿奈：「嗯．．．」

阿ｓａｍ同阿奈就係呢邊飲緊酒，我就同阿逸係舞池跳緊。
而阿鋒同阿龍就坐在係另一邊度傾緊計。
阿龍：「鋒哥，做咩好似好無心機咁呀？」
阿鋒：「無呀。」
阿龍：「咪呃我啦，第一日識你咩。」
阿鋒：「得啦，無事喎。」
阿龍：「ｏｋ啦，你話無事就無事．．．係呢，阿嫂唔跟埋你落黎既？」
阿鋒：「你知佢不嬲都唔鍾意黎呢ｄ地方架啦，咪由佢係屋企靜下囉。」
阿龍：「話時話，佢又會無啦啦轉左黎我地間學校讀既．．．」
阿鋒：「鬼知佢發咩神經咩．．．」
阿龍：「佢唔係諗住黎睇實你唔比你溝女呀．．？」阿龍係度笑。
阿鋒無理到佢，繼續係度飲佢既酒．．．
隔左一陣，阿龍睇到我同阿逸係舞池度跳舞，就拍阿鋒。
阿龍：「喂，個個阿逸都落左黎喎。」
阿鋒：「係咩？咁點？」阿鋒望都無望。
阿龍：「無野呀，通知聲你姐．．．佢同阿ｋａ係度跳緊。」
呢次阿鋒個反應比較大，即刻就擰轉身望住我同阿逸。

其實我同阿逸都係係度跳舞姐，無咩其他野。
我：「喂，我好支力　呀，不如上去坐陣囉。」跳到身水身汗，係時候上去坐坐食返支煙。
阿逸：「好呀。」佢好主動拖住我隻手行出去。
無咩既，咁舞池逼，佢驚我行唔到出去拖住我都唔出奇。
我同阿奈都會咁啦。
上到去我同佢就坐左係梳發度。
我：「拎黎啦，我幫你點。」我見阿逸點極都點唔到支煙，就搶左佢個火機幫佢點煙。
點完煙之後，大家都坐左係度聽歌。
好支力，我個頭都不知不覺咁訓左落阿逸度。
就係大家都係度食緊煙聽緊歌休息緊之際．．．．
阿逸突然之間攬住我，仲一啖咀左落我度！
我完全唔知比咩反應佢好，呆左一陣先識得推開佢。
不過女仔ｄ力點同男人鬥，就算佢爆左都叫係個男人，我當然唔夠佢大力啦，仲比佢咀到有ｄ．．．暈暈低．．．

阿ｓａｍ：「喂！老婆！你睇下個邊！」阿ｓａｍ見到我同阿逸係度咀，即刻就拍阿奈。
阿奈：「咩呀？」
阿ｓａｍ：「阿ｋａ同阿逸係度打茄輪呀！」
阿奈：「唔係掛？！」阿奈即刻搵我地既蹤影，足之就係梳發度見到我同阿逸係度攬埋一舊咀緊。
阿ｓａｍ：「咁快手呀！識左一日就已經打茄輪。」
阿奈：「哈，咁同呢個阿逸一齊都好過同條卜X一齊。」
呢個時候阿鋒咁岩擰轉頭想搵下我地係邊。
點知就比佢見到我同阿逸係度攬埋一舊，仲要係度咀緊ｔｉｍ。
阿鋒第一時間衝埋黎，行到埋黎咩都無講就一手拉開左我，仲一拳打落阿逸度！
我呆左陣先知道佢地打交，第一時間梗係推開佢地啦！
我：「喂！你做咩打人呀？！」我見阿逸比阿鋒打到趺左係地，即刻就問阿鋒。
阿鋒無出聲，只係係度怒啤緊阿逸。
我：「點呀？你有無事呀？」我行埋去扶起阿逸，仲睇下佢塊面有無傷到。
阿逸雖然仲係迷迷地，不過呢一拳都已經打醒左佢唔少。佢擰下個頭，等於話左比我知佢無事。
我：「你無啦啦做咩打人姐？！」我繼續問阿鋒。
佢仍然都係無出到聲。
阿ｓａｍ：「喂，做咩呀？」阿ｓａｍ見到阿鋒打人都嚇左一跳，即刻走過黎睇下咩事。
阿鋒：「無野！」佢講完呢句之後，就擰轉身走左去，不過聽得出，佢好嬲。
阿ｓａｍ：「老婆，你係度睇一睇住佢地，我去追條ｏ靚仔。」阿ｓａｍ同阿奈講完之後，都跟住阿鋒出左去。

我：「點呀，你真係無事呀？」
阿逸：「得啦，我無事呀．．．」
我：「不如我同你返屋企先啦．．．」
阿逸：「傻啦，少少傷唔係咩大事，我頂得住架喎。」
我：「你都瘀晒囉，仲話無事！返屋企啦好無？」
阿逸：「好啦，聽你話，返屋企啦。」
我：「嗯。」
唔知點解見到阿逸比人打，個心好似唔係好舒服咁。
或者可能係受左頭先佢個啖既影響啦．．．．．
我：「奈，我同佢返屋企先啦．．．」
阿奈：「你搞唔搞得掂架？」
我：「得啦，我得架喎。」
阿奈：「嗯，咁有咩你就搵我啦。」
我：「嗯。」
我扶住阿逸，慢慢行返佢屋企。